सिन्धुपाल्चोकको चौतारा साँगाचोकगढी नगरपालिका–१४, डडुवामा गोलभेडा सहित विभिन्न प्रकारका अचार उत्पादन तालिम सुरु गरिएको छ। बागमती प्रदेश सरकारको सशर्त अनुदान तथा चौतारा साँगाचोकगढी नगरपालिकाको आर्थिक सहयोगमा नेत्रज्योती कृषि सहकारी संस्थाले माझी तथा विपन्न परिवारलाई लक्षित गरी आय–आर्जन कार्यक्रम अन्तर्गत तालिम सञ्चालन गरेको हो।
तालिमको उद्घाटन नगरपालिकाका प्रमुख प्रशासकीय अधिकृत बैकुण्ठ प्रसाद सापकोटाको प्रमुख आतिथ्यतामा तथा नगरपालिका लेखा समितिका संयोजक एवं वडा नं. १४ का वडाध्यक्ष उद्धव नेपालको विशेष आतिथ्यमा सम्पन्न भयो।
नेत्रज्योती कृषि सहकारी संस्थाका व्यवस्थापक नेत्रबहादुर बस्नेतका अनुसार स्थानीय स्तरमा उत्पादन हुने गोलभेडा, लप्सी, काउली, अमला, स्कुस लगायतका सामग्री प्रयोग गरी बजारयोग्य अचार निर्माण गरी गाउँकै उत्पादनलाई ब्रान्डिङ र बजार विस्तार गर्ने उद्देश्यका साथ तालिम सुरु गरिएको हो।
उद्घाटन समारोहलाई सम्बोधन गर्दै प्रमुख प्रशासकीय अधिकृत सापकोटाले स्थानीय उद्यमी तथा कृषकलाई प्राविधिक र आर्थिक रूपमा सहयोग गर्न नगरपालिका प्रतिबद्ध रहेको उल्लेख गर्नुभयो। उहाँले सरकारले उपलब्ध गराएको सहयोगको प्रभावकारी उपयोग गरी गाउँमा उत्पादन हुने सामग्रीलाई मूल्यवर्धन गर्नुपर्नेमा जोड दिनुभयो।
विशेष आतिथ्य वडाध्यक्ष उद्धव नेपालले गाउँमै उत्पादन भएका सामग्री प्रशोधन गरी व्यावसायिक रूपमा बजारसम्म पुर्याउने लक्ष्यअनुसार सहकारीले सुरु गरेको यो कार्यक्रम निर्णायक हुने अपेक्षा व्यक्त गरे।
जनहित दुग्ध उत्पादक सहकारी संस्थाका अध्यक्ष तथा डडुवा भवानीशंकर माध्यमिक विद्यालयका प्रअ बद्री प्रसाद नेपालले स्थानीय उत्पादनको बजारिकरणमा नेत्रज्योती सहकारीको प्रभावकारी भूमिकाको प्रशंसा गर्दै यसले किसानलाई आर्थिक रूपमा सबल बनाउन मद्दत गर्ने धारणा राखे।
कृषक समूहका मोहन बस्नेत ‘सम्भु’ ले सहकारीले नयाँ कार्यको सुरुवात गरी कृषकहरूको आय–आर्जनमा सहजता ल्याएकोमा धन्यवाद व्यक्त गरे। तालिमकी सहभागी अन्जु माझीले माझी समुदायका लागि यस्ता कार्यक्रम पहिले कहिल्यै नआएको बताउँदै, सिकेका सीपले जीवनयापनमा प्रत्यक्ष योगदान गर्ने विश्वास व्यक्त गरिन्।
कार्यक्रम नेत्रज्योती कृषि सहकारी संस्थाका अध्यक्ष कृष्णबहादुर नेपालको सभापतित्वमा सम्पन्न भएको थियो। कार्यक्रममा बज्रयोगिनी अपाङ्ग मैत्री सहकारी संस्थाका अध्यक्ष चतुरबहादुर तामाङ, माझी समुदायका विभिन्न व्यक्तित्व तथा स्थानीयको उल्लेख्य उपस्थिति रहेको थियो।
उद्घाटन समारोह वडा कार्यालयको प्राङ्गणमा सम्पन्न भएको थियो। प्रमुख प्रशासकीय अधिकृत सापकोटाले तालिमको औपचारिक सुरुवातका क्रममा सहभागीहरूलाई अचार निर्माणको प्रारम्भिक प्रक्रिया देखाउँदै प्रत्यक्ष सहभागिता जनाउनुभयो।
नगरपालिका उद्यमी विकास शाखाका सहजकर्ता अर्जुन गतराजले अचार बनाउने सीप, गुणस्तर नियन्त्रण, स्वच्छता, सुरक्षित संरक्षण र बजारिकरणका विषयमा विस्तृत प्रशिक्षण प्रदान गरे।
नेत्रज्योती कृषि सहकारी संस्थाकी कोषाध्यक्ष सीता बानीयनका अनुसार सहकारीले आगामी वर्षदेखि गाउँमा उत्पादन हुने गोलभेडालाई गाउँमै प्रशोधन तथा खपत हुने गरी अचार उद्योगलाई थप संस्थागत गर्दै विस्तार गर्ने योजना तयार पारेको छ।
