बन्देउ । सशस्त्र प्रहरी बल, १६ नं गण, बन्देउ र जिल्ला प्रहरी कार्यालय, सिन्धुपाल्चोकको संयुक्त टोलीले बन्देउमा १८ सेल अश्रुग्यास प्रहार गरेको छ भने ५ राउन्ड हवाई फायर गरेको छ।
अरनिको राजमार्गको विस्तारकाे निर्णयविरुद्ध नाराबाजी र प्रदर्शनको क्रममा स्थानिय आन्दोलनकारीको भिड नियन्त्रणका लागि प्रहरीले पानीको फोहोरा समेत प्रयोग गरेको थियो। आन्दोलनमा १ जना सशस्त्र प्रहरी र २ जना प्रदर्शनकारी घाइते भएका छन् ।
यी दृश्यहरू हेर्दा ठ्याक्कै वास्तविक झैं लाग्थ्यो, तर दुवै सुरक्षा निकायका बागमती प्रदेश प्रमुखहरु सहितको उपस्थितिमा सो कृतिम घटना अभ्यास गरिएको सशस्त्र प्रहरी १६ नं गण, बन्देउका गणपति अच्युतमकुमार मजगैयाँले बताउनुभयाे। सशस्त्र प्रहरी तथा नेपाल प्रहरीले बन्देउमा गरेको यस कृतिम घटना अभ्यास भिड नियन्त्रण र कर्फ्यु व्यवस्थापनका विभिन्न चरणहरूको व्यवहारिक अभ्यास थियो। सो अभ्यासमा चेतावनीदेखि लिएर लाठी चार्ज, अश्रुग्यास, पानीको फोहोरा, हवाई फायर र घाइतेकाे उद्धारसम्मको दृश्य प्रस्तुत गरिएकाे थियाे।
प्रशासनका पदाधिकारीहरूका अनुसार अभ्यासको मुख्य उद्देश्य अहिलेको संवेदनशील परिस्थितिमा सुरक्षा निकायहरूलाई व्यवहारिक रूपमा तयार गराउनु थियो। सिन्धुपाल्चोकका प्रमुख जिल्ला अधिकारी बन्धुप्रसाद बास्तोलाले 'सशस्त्र र नेपाल प्रहरी प्रतिस्पर्धी होइनन्, परिपूरक हुन्' सानो जनशक्ति तथा सीमित स्रोतसाधनको अवस्थामा समेत प्रभावकारी रूपमा भिड नियन्त्रण गर्न सक्ने खालको तयारी आवश्यक रहेको बताउनुभयाे। उहाँले आउँँदो निर्वाचन तथा सामाजिक अस्थिरताको बेला थप सतर्कता र पूर्वतयारीको आवश्यकता औँल्याउनुभयाे।
नेपाल प्रहरीले पहिलो घेराबाट अवस्था नियन्त्रण गर्नुपर्ने र आवश्यकता अनुसार सशस्त्र प्रहरीलाई सहायक बलको रूपमा परिचालन गरिने उल्लेख गर्नुभयाे।
बागमती प्रदेश प्रहरी प्रमुख अरुण पौडेलले भने आन्दोलनको प्रकृति अनुसार समानुपातिक जनशक्ति र उपकरण प्रयोग गर्नुपर्ने, समयमा सूचना प्रवाह र जनशक्ति तालिमको भूमिकालाई कमजोर नबनाउने कुरामा जोड दिनुभयाे। सशस्त्र प्रहरी ३ नं बाहिनि, गढिमाइका बाहिनिपति अञ्जनी कुमार पोखरेलले पनि अभ्यासले व्यवहारिक अनुभव दिने र वास्तविक घटना सबैले अनुकरण नहुने भए तापनि सबै परिस्थितिका लागि तयार रहन मार्गदर्शन गर्ने बताउनुभयाे।
कार्यक्रममा जिल्लाका सबै सुरक्षा निकायका प्रमुखहरुकाे उपस्थिति रहेकाे थियाे ।
